ලෝකයා වඩාත් කැමැති, ක්‍රීඩා ප්‍රවෘත්ති ඔස්සේ පාපන්දු ක්‍රීඩකයින්ගේ කොණ්ඩා විලාසිතා ගැන කථා කරන්නද, ටෙනිස් ක්‍රිඩිකාවන්ගේ කෙටි සාය ගැන විමසන්නද?
ක්‍රීඩා වාර්ථාකරුවකු ලෙස එකල,
“මුහුදුමට්ටමේ සිට මීටර් 2,500 ට ඉහළින් ජාත්‍යන්තර තරග පැවැත්වීමේ FIFA තහනම බොලිවියාවට බලපෑ හැටි, එවො මොරාලෙස් ඒ හා ගැටුණ හැටි, බෙයිජින් 2008 ඔලිම්පික් උලෙළේ මානව හිමිකම් විවාද, චීනයේ මානව හිමිකම් වාර්තා, ටිබෙටයට එරෙහි ගෝලීය විරෝධතා, මේරියන් ජෝන්ස් ෆෙඩරල් නිලධාරීන්ට බොරු කීම, WADA හි තහනම් උත්තේජක විරෝධී නීති, ක්‍රිකට් ක්‍රිඩාවේ දූෂණ සහ දේශපාලන මැදිහත්වීම්, තරග පාවාදීමේ චෝදනා, පශ්චාත් තලෙබාන් ප්‍රහාර සමය සහ ඇෆ්ගනිස්ථාන ක්‍රිකට් නැග්ම” ගෝලීය දේශපාලන, සංස්කෘතික, නෛතික, සාමාජයීය, විද්‍යාත්මක හෝ කාලගුණ දේශගුණ ආදී නොයෙක් ප්‍රවණතා ලියාගෙන යද්දී ප්‍රඩියුසර් අහන්නේ ‘මේ මොනවද බං, උඹ ක්‍රිඩා ගැන ලියන්නැද්ද?’
මක්නිසාද රූපවාහිනී ප්‍රේක්ෂකයන් බහුතරයකට අවශ්‍ය එදිනෙදා තරගයක ලකුණු හෝ ස්ථාන හෝ සම්මාන හෝ වෛවර්ණ සමාරම්භක උත්සව, ක්‍රිඩා තරු දකින්න ගොසිප් බලන්න පමණක් බව ඔවුන් අත්දැකීමෙන් ම දැනැ සිටි බැවිනි. බිලියට්, එල්ලේ, කැරම් ආදී අප්‍රධාන ධාරාවේ නිව්ස් ලියාගෙන යද්දීද ප්‍රඩියුසර්ස්ලා හිස අතගසමින් අහන්නේ ‘බං නැද්ද ක්‍රිකට් ෆුට්බෝල් මුකුත්?’
මේ සියල් කාලගෝට්ටි මැද, ශ්‍රී ලංකාවේ එක් මිනිසෙක් නිහඬව, අප පසුකරමින් බයිසිකලයක් පැදගෙන ගියේය, සෑම දිනකම. මග දිගට අත්පොළසන් නැත, ගමන මැද වතුර බෝතල් නැත, මාර්ගයද- මුරණ්ඩු හදවතද ඇත. මට සිහිපත් වුණේ මගේ තාත්තාය. ඔහුත් අදටත් පාපැදිය අතැර නැත.
ඒ එම් සුමනවීර ක්‍රිඩකයා පිළිබඳ ඔහුගේ පවුලේ තොරතුරු කථාබස් සමග, සුමනවීරගේ 1965න් ඇරැඹි බයිසිකල් තරග ක්‍රියාන්විතය ගැන, තරගයෙන් විශ්‍රාම ගත් නමුත් රත්නපුරේ සිට කොළඹ දක්වා පැය තුනක් තිස්සේ බයිසිකලේ පදිමින් ඔහු දෛනිකව හලන දහඩිය බිංදුවක් ගාණේ ඊට උපහාර පුදමින් දිගු රචනාවක් ලියාගෙන ප්‍රඩියුසර් හමුවීමි, “යකෝ මේක ඩොකියුමෙන්ට්‍රියක්, අපට ඕන නිව්ස්!”
එදා, ලැබෙන මිනිත්තුවක දෙකක කාලයකට හරියන්න- වහා විකිණෙන සුළු නිව්ස් ලියාගන්න බැරිවුණ ක්‍රීඩා පුවත් වාර්තාකරුවා මමය.
පදක්කම්, අනුග්‍රාහකත්වයන් හෝ කැමරා කණ්ඩායම් නොපතා නොලබා නමුදු, හැල්මේ කඳු නැගි විශේෂඥයා ඔහුය, බොහෝ දෙනා නාඳුනන ජාතික වීරයා ඔහුය, ලාංකේය බයිසිකල් පුරාවෘත්තය ඔහුය, පාපැදි තානාපතිවරයා ඔහුය, පාපැදි දිගු දුර මගියා ඔහුය.
ඒ එම් සුමනවීර;
දූපතේ සිට ජීවිතේ කඳුමුදුනට ජයග්‍රාහී පාපැදි සවාරියක්!
(ඒ එම් සුමනවීර නම් ලාංකේය පාපැදි ශූරයාගේ අභාවය නිමිත්තෙන් තැබූ සටහනක්: https://www.facebook.com/ViduraDiasLive?mibextid=wwXIfr)